| I. Аз есмь Господь Бог твой: да не будут тебе бози инии, разве Мене. |
| II. Не сотвори себе кумира и всякаго подобия, елика на небеси горе, и елика на земли низу, и елика в водах под землею: да не поклонишися им, ни послужиши им. |
| III. Не приемли имене Господа Бога твоего всуе. |
| IV. Помни день субботный, еже святити его: шесть дней делай, и сотвориши в них вся дела твоя, в день же седьмый, суббота, Господу Богу твоему. |
| V. Чти отца твоего и матерь твою, да благо ти будет, и да долголетен будеши на земли. |
| VI. Не убий. |
| VII. Не прелюбы сотвори. |
| VIII. Не укради. |
| IX. Не послушествуй на друга твоего свидетельства ложна. |
| X. Не пожелай жены искренняго твоего, не пожелай дому ближняго твоего, ни села его, ни раба его, ни рабыни его, ни вола его, ни осла его, ни всякаго скота его, ни всего, елика суть ближняго твоего. |
| 1. Блажени нищии духом, яко тех есть царствие небесное. |
| 2. Блажени плачущии, яко тии утешатся. |
| 3. Блажени кротцыи, яко тии наследят землю. |
| 4. Блажени алчущии и жаждущии правды, яко тии насытятся. |
| 5. Блажени милостивии, яко тии помиловани будут. |
| 6. Блажени чистии сердцем, яко тии Бога узрят. |
| 7. Блажени миротворцы, яко тии сынове Божии нарекутся. |
| 8. Блажени изгнани правды ради, яко тех есть царствие небесное. |
| 9. Блажени есте, егда поносят вам, и ижденут, и рекут всяк зол глагол на вы лжуще, Мене ради.Радуйтеся и веселитеся, яко мзда ваша многа на небесех. |
| 1-й член. Верую во единого Бога Отца, Вседержителя, Творца небу и земли, видимым же всем и невидимым. |
| 2-й. И во единаго Господа Иисуса Христа, Сына Божия, Единородного, Иже от Отца рожденного прежде всех век, Света от Света, Бога истинна от Бога истинна, рожденна, не сотворенна, единосущна Отцу, Им же вся быша; |
| 3-й. Нас ради человек и нашего ради спасения сшедшаго с небес, и воплотившагося от Духа Свята и Марии Девы, и вочеловечшася; |
| 4-й. Распятаго же за ны при Понтийстем Пилате, и страдавша, и погребенна; |
| 5-й. И воскресшаго в третий день, по писанием; |
| 6-й. И восшедшаго на небеса, и седяща одесную Отца; |
| 7-й. И паки грядущего со славою судити живым и мертвым, Его же царствию не будет конца. |
| 8-й. И в Духа Святаго, Господа Животворящаго, Иже от Отца исходящаго, Иже со Отцем и Сыном спокланяема и сславима, глаголавшаго пророки. |
| 9-й. Во едину, святую, соборную и апостольскую Церковь. |
| 10-й. Исповедую едино крещение во оставление грехов. |
| 11-й. Чаю воскресения мертвых. |
| 12-й. И жизни будущего века. Аминь. |
